ლექცია თემაზე: „გმირის მოგზაურობა - წარმატების გზა და მასზე არსებული საფრთხეები“

13 ნოემბერს კავკასიის საერთაშორისო უნივერსიტეტის უწყვეტი განათლებისა და კარიერული განვითარების სამსახურის ორგანიზებით „კარიერული კომპასის“ ტრენინგ-კურსის ფარგლებში ექიმი-ფსიქოთერაპევტის, დიანა ნიკოლაიშვილის ლექცია გაიმართა თემაზე: „გმირის მოგზაურობა - წარმატების გზა და მასზე არსებული საფრთხეები“.

„წარმატება რეალურად ყოველდღიურობაშია და ეს არ არის რაიმე შორეული ერთი პუნქტი. ამასთან ერთად, ძალიან მნიშვნელოვანია, თვითონ როგორ ხედავენ ადამიანები საკუთარ თავს, რამდენად შეუძლიათ და სახავენ გეგმებს და გეგმის დასახვის შემდეგ, როგორ მოქმედებენ. ამ გზაზე შიშებთან ერთად, ჩვენ გვაქვს შინაგანი ხმა, რომელიც წესით უნდა გვიბიძგებდეს წარმატებისკენ, მაგრამ არასწორი და არაჯანსაღი აღზრდის შედეგად, როგორც ხშირად აღმოჩნდება ხოლმე, სამწუხაროდ, ფერხდება და ეს არის ის შინაგანი რწმენა-წარმოდგენები, რომ წარმატება ზოგადად შეუძლებელია, წარმოუდგენელია კონკრეტული ინდივიდისთვის ან ის უბრალოდ არ იმსახურებს ამ წარმატებას. ასევე ვისაუბრეთ „გმირის მოგზაურობაზე“, იმ უნივერსალურ მეტაფორაზე, თუ როგორ ვითარდება ადამიანი, რომ ეს განვითარება უწყვეტია და სპირალური და ყოველი შემდეგი წრე ახალი რესურსის, გამოცდილებისა და გაფართოების მომტანია,“ - აღნიშნა დიანა ნიკოლაიშვილმა. 

შეხვედრის ფარგლებში აუდიტორიას შესაძლებლობა ჰქონდა მათთვის საინტერესო კითხვებზე მიეღოთ პასუხები. ღონისძიებას კავკასიის საერთაშორისო უნივერსიტეტის ხუთივე ფაკულტეტის სტუდენტები ესწრებოდნენ.

ლექციას მოდერაცია CIU-ს უწყვეტი განათლებისა და კარიერული განვითარების სამსახურის კოორდინატორმა გურამ ლილუაშვილმა გაუწია.