შეხვედრა დავით კენჭაძესთან / მემორანდუმი

17 მარტს კავკასიის საერთაშორისო უნივერსიტეტში (CIU) ბიზნეს ლიდერ დავით კენჭაძესთან საჯარო შეხვედრა და მემორანდუმის ხელმოწერის ოფიციალური ცერემონია გაიმართა.
 ღონისძიება CIU-ს უწყვეტი განათლებისა და კარიერული განვითარების სამსახურისა და ბიზნესისა და ტექნოლოგიების ფაკულტეტის ორგანიზებით ჩატარდა. სამუშაო შეხვედრის ფარგლებში, ხელი მოეწერა ურთიერთთანამშრომლობის დოკუმენტს, რომელსაც ხელი კავკასიის საერთაშორისო უნივერსიტეტის რექტორმა, კახაბერ კორძაიამ და KENCHADZE.GROUP-ის დამფუძნებელმა, დავით კენჭაძემ მოაწერეს.
 მემორანდუმის საფუძველზე, სტუდენტებისა და კურსდამთავრებულებისთვის კარიერული მხარდაჭერის ახალი მექანიზმები ამოქმედდა: სტუდენტებს საშუალება ეძლევათ, გაწევრიანდნენ სპეციალიზებულ სააგენტოში და შექმნან პროფესიული პროფილები; პლატფორმის წევრები პრიორიტეტულ რეჟიმში მიიღებენ ინფორმაციას ბაზარზე არსებული აქტუალური ვაკანსიების შესახებ; ჯგუფის ბაზაში რეგისტრაცია ხელს შეუწყობს სტუდენტების კვალიფიკაციის შესაბამისი პოზიციების ოპერატიულ მოძიებას.
 საჯარო შეხვედრაზე დავით კენჭაძემ აკადემიური ცოდნისა და პრაქტიკული უნარების სინთეზის აუცილებლობაზე ისაუბრა. მომხსენებელმა ხაზი გაუსვა, რომ ფუნდამენტური განათლება წარმატების საბაზისო პირობაა, თუმცა პროფესიული საქმიანობისთვის კრიტიკულად მნიშვნელოვანია სტრესულ გარემოში ოპერირება და რისკების მართვა.
 ექსპერტის განმარტებით, თანამედროვე შრომის ბაზარზე კონკურენტუნარიანობის შესანარჩუნებლად საჭიროა ორი უნივერსალური მიმართულების ფლობა: სტრატეგიული მენეჯმენტი; გაყიდვების მართვა. აღნიშნული უნარების განვითარება, დარგობრივ კომპეტენციასთან ერთად, განიხილება როგორც შედეგზე ორიენტირებული მუშაობის ძირითადი წინაპირობა.
 ღონისძიებას კავკასიის საერთაშორისო უნივერსიტეტის ადმინისტრაციული და აკადემიური პერსონალი, ასევე სხვადასხვა ფაკულტეტის სტუდენტები ესწრებოდნენ.