საჯარო შეხვედრა კომპანია "Geosoft Cloud-თან"

25 ნოემბერს კავკასიის საერთაშორისო უნივერსიტეტში გაიმართა საჯარო შეხვედრა თემაზე: „შენი მომავალი პროფესია ღრუბლოვან ტექნოლოგიებში Geosoft Cloud-თან ერთად“;

შეხვედრის მიზანი იყო სტუდენტებისთვის კარიერული განვითარების პერსპექტივების გაცნობა ღრუბლოვანი ტექნოლოგიების სფეროში, კერძოდ კი Google Cloud-ის სპეციფიკის გათვალისწინებით. ღონისძიების ფარგლებში მომხსენებლებმა განიხილეს ისეთი საკითხები, როგორიცაა:

1. ღრუბლოვანი ტექნოლოგიების მნიშვნელობა და მისი მზარდი როლი თანამედროვე ციფრულ სამყაროში;
2. ამ მიმართულებით არსებული მოთხოვნადი პროფესიები და კარიერული შესაძლებლობები;
3. Google Cloud-ის სპეციფიკა და განვითარების პერსპექტივები;

შეხვედრის მომხსენებლები გახლდათ Geosoft Cloud-ის წარმომადგენლები:

თორნიკე ჩარკვიანი - მომხმარებელთა წარმატების მენეჯერი და დავით ტოგონიძე - ბიზნეს განვითარების მენეჯერი;
აღსანიშნავია, რომ დღევანდელი ღონისძიების სპიკერები არიან Google-ის მიერ სერტიფიცირებული Cloud ინჟინრები;

ღონისძიების დაწყებამდე აუდიტორიას მიესალმა CIU-ს ბიზნესისა და ტექნოლოგიების დეკანი ქეთევან ნანობაშვილი, რომელმაც ხაზი გაუსვა დღევანდელი ღონისძიების მნიშვნელობას:
„მსგავსი ფორმატის აქტივობები სტუდენტებს ეხმარება კარიერული პერსპექტივების დაგეგმვაში და იმ კომპეტენციების იდენტიფიცირებაში, რომელიც მათ დასაქმებისთვის სჭირდებათ, განსაკუთრებით კი ისეთ ინოვაციურ სფეროში, როგორიცაა ღრუბლოვანი ტექნოლოგიები,“ - განაცხადა ქეთევან ნანობაშვილმა;

აუდიტორიას სიტყვით მიმართა ასევე შეხვედრის მოდერატორმა, CIU-ს უწყვეტი განათლებისა და კარიერული განვითარების სამსახურის კოორდინატორმა, გურამ ლილუაშვილმა:

„ჩვენი მთავარი მიზანია, სტუდენტებს მივცეთ მაქსიმალური შესაძლებლობა, დაუკავშირდნენ წამყვან კომპანიებს, გაიგონ თანამედროვე შრომის ბაზრის მოთხოვნები და სწორად დაგეგმონ თავიანთი პროფესიული მომავალი ციფრულ ეპოქაში. დღევანდელი შეხვედრა სწორედ ამ მისიის ნაწილი გახლდათ,“ - აღნიშნა გურამ ლილუაშვილმა;

აღსანიშნავია, რომ ღონისძიების ფარგლებში კავკასიის საერთაშორისო უნივერსიტეტსა და Geosoft Cloud-ს შორის გაფორმდა ურთიერთთანამშრომლობის მემორანდუმი, რომელსაც ხელი მოაწერა CIU-ს ვიცე-რექტორმა, აკადემიური პროცესის მართვის სამსახურის უფროსმა, თამარ ინასარიძემ;

შეხვედრისას სტუდენტებს შესაძლებლობა ჰქონდათ დაესვათ კითხვები და მიეღოთ ამომწურავი პასუხები მათთვის საინტერესო საკითხებზე, ბოლოს კი კომპანია Geosoft Cloud-ის მხრიდან გაიმართა წამახალისებელი გათამაშება, რომლის ფარგლებშიც სტუდენტები სიმბოლური საჩუქრებით დაჯილდოვდნენ